مع هيكل تبقى كبير أو ممكن تبقى مشير
اصلا هيكل من يومه عفريت وحلنجي خطير
فى العهد الملكى اتربع فوق عرش القول والقيل
جن مصور من يومه على عرش الكلمه خبير
أصله ادرب بمهارة في جريدة الاستعمار
والدرس الأول فيها ازاى تهزم ثوار
وتفك الثورة تخلى الناس كلها تحتار
والشعب يقسم نفسه خاين وعميل وحمار
مع هيكل تبقى كبير أو ممكن تبقى مشير
هيكل على طول كان فوق يختار الكلمة بذوق
وملوش دعوه بالخلق بصرحه ملوش فى العك
عايش مع نفسه فى عالم والناس كلها تندك
ميحبش ناس التحت منخيره معلقه فوق
كان نجم القصر زمان خد جايزة كنج فاروق
وفي شغله عارف فين وازى يعرف يختار
خلى بالك يامواطن تربية الاستعمار
مع هيكل تبقى كبير أو ممكن تبقى مشير
أما فى العهد التانى أصبح هو الحلواني
في الثورة على فاروق كان واد حت وفنان
مش زى الأخوه أمين أفتكروا الثورة ميدان
من أول يوم فى الثورة ركب الحركه من النص
وفضل على مهل يدور يتأكد مين البوص
على طول راح فهم الفوله راح نط فى عب جمال
وساب الناس المشغوله بالثوره وبالأحرار
ركز على الضابط فيهم اللى معاه المفتاح
زى دلوقتى تمام مع سيسي أبد الفتاح
مع هيكل تبقى كبير أو ممكن تبقى مشير
ومابين حرب ومشروع كان سادن كل مناوره
فضل الكاتب المشفوع صاحب فرعون الشعب
لما الفرعون ادك وخسر جيشه فى ساعات
كان هيكل هو مهندس فلسفة التعلب فات
وهزيمه صبحت نكسه والشعب ده كروديات
مع هيكل تبقى كبير أو ممكن تبقى مشير
الفرعنه سلو بلدنا هنروح ما الفرعنه فين
لما الفرعون بيموت على طول بنركب تانى
هات أى حمار مربوط يبقى فرعون فى ثواني
لكن.. الفرعون التاني كان ناب أزرق تعبان
كامن تحت الفرعون ساجد راكع متفانى
كان يحكى للأولاد ديما عن عم جمال
راقد فى الدره ومركز ومحافظ على المسافات
ساهى وعامل درويش رقدت نمس الحيات
وفضل نايم تحتاني مستموت يبقى التاني
مع هيكل تبقى كبير أو ممكن تبقى مشير
كل اسرار الدولة محفوظه عنده تمام
وكان الفرعون النمس تحت عين الفنان
كانت اللعبه مكشوفه معروفه أصلها ايه
وعشان فرعون يثبت معروف كان لازم ايه
أوتاد لازم تتغير وتقوم من تانى يا بيه
مع هيكل تبقى كبير أو ممكن تبقى مشير
هتقول خاين وانانى وعمره ما كان للشعب
وهقولك هيكل شايف جوهر مصر الفرعون
الشعب والفرعون بالنسبه لهيكل حزمه
واللى هيفكك فيها يضربه هيكل بالجزمه
مع هيكل تبقى كبير أو ممكن تبقى مشير
هيكل كاهن فرعوني للفرعنه حرفين
طب بص وراك من تانى
هتشوف الفرعون مين
مين اصلا كان متصيت والكل بيجرى عليه
العالم كله صحابه والدنيا ملك أيديه
يختار على كيف كيف كيفه
والشعب بيسمع ليه
كل فرعون اتفرعن كان ليه مع هيكل فصل
خيه ديما ملفوفه بوطنية رجل العصر
